Raltlan Pawl Hrang Ti ih Lung Thiangten Ka Telnak Ah Huatu Le Duhtu Kan Nei Cio – Solomon KMRH

Hla phunphun a rakthiam tlunah Rock hla a nehsawh tuk cu Chin Rock Siangpahrang titiangin Chin mipi ih hmin phuahsakmi hlasakthiam Solomon KMRH cun Chin raltlan pawl hrang tiah kawl in a suah netabikmi Album hrekkhat man a thawh ve cu huatu le duhtu an um thu mipi simtheihnak a nei.

Hlasakthiam Solomon KMRH cun “A pakhatnak ah raltlan pawl hrang țhathnem dingah, a pahnihnak ah santhar hla in thazang lak duh hrangah, pathumnak ah ka hnaṭuannak in mi tam luatnak an ngah dingah a si.

Hih kawl Christian Rock album ih ngahmi cu raltlan hrang a si tiah theihternak tuah rori ko nan online donation tuah uhla titu an um hi cu a lungput a lang ko. Nisa le ruah lakah hlasak in raltlan hrang a hlu an khan a țha tuk vekin hih album sumpai cem zat liangluang har zet ih suahmi hih album cd pakhat man ah 1500 mmk raltlan hrang a si ti thei na cingin theipi lo vekih rak um san kan um phah hi cu hi pawl lakah tlaihsan aw zet vekih rak umpawl tla an rak um mahnaa mi tenau deuh pawl nih mi thik an hmang țheu “mi pakhat in mirang pawl hi mithiik tla an nei lo anmah sinak ah an nuam awk ih mi cungcuang pawl an duhsak” a rak ti dah.

Lai khawte um an sinan mi țhatnak duhsak zettu an um thotho ih mah cu cangkang vekin um ko nan sunglam mi țhatnak hmu sak lo iksiknak ih khat cun hnangamnak tla nei a har zet ding. Chin/Falam (Lai) hla love song sak in kum 14 le Christian hla in kum 6 sung kom ka hlasak zalam tluan kum (20) ka tlanlennak ah love song sakih mipi le Christian hla sakih mipi an bang awlo men naa a tikcu caan tete ih tha i petu pawl parah ka lungawi ka lungkim lawlaw.

Ka sim duhmi cu tu ka kawl album hi ka hnaṭuannak a si ih kan suah ve ciah hrawngah ka thlacamnak ah raltlan hrang hlu lawlaw ding ka thinlung ah a suak ih CCA pawl ka contact cihmi a si. Thlacamnak le mai duhhril rorin tuahmi a si ruagnah hla in si seh sumpai in si seh raltlan pawl hrang țhathnem ding hi ka duhbikmi a si.

Kawl Christian Rock Album “Tu” timi cu Chin Rocker ti nan kawh reromi pa in a suah a si ti kha mi na va hlawm vivo ih hih album hmangin raltlan hrang ka telve a si na ti ngaingai ahcun rak zingzoi ko aw (online in si seh ph thawn i suttu hmuahhmuah tla) ka lungawi PATHIAN in lo malsawm sin hngai seh law. “Ramleng ih umpawl nan ngahtheinak ding tawlrel rero lai a si” tiah a tarlang.

Lai hla in Album 4 rak suah zotu hlasakthiam Solomon KMRH cun kawl in thangthatnak zaihla Album thar “Amah” timi cu July 20 ah Rev.Saya Zaw Win ih thlacamnak in tlangthannak a rak nei zo. Album pakhat ah Ks.1000 in zuar a si ih midang in an zuar sawngmi lei asile Ks.1500 a si ding. Covid 19 boruak ruangah a bur in zuar a harsa ih a lei duhtu cun ph:09450686648 hnenah cah theih a si ih hmunhla ah Album 10 tlun cah asile umnak khua tiang an kuat thei. Cumi tlunah CCA General Secretary Dr.Charity Htoo hnen khalah cah theih a si ih anih cu raltlan hrang theitawk ih ṭan la rerotu pakhat a si.

Tuiṭum ih Album man ṭhen 3 in ṭhen 2 Chin raltlan pawl hrang a hlan thu ah Solomon KMRH cun “Unaupawl hih ka solo album cu CCA GS Dr.Charity Hto GS hnenah ka hlan zo ih cd man țhen thum țhen hnih kha kan Chin raltlan pawl hrangah a si timi ka lo theiter duh. Thazang lak phah in raltlan pawl nan rak bawm cio dingah KHRIH hmin in ka lo sawm hai a si,” tiah a rak tarlang rero zo.

Album cu US ih um Salai Tuk Tuk Chris ih sumpai tummi a si ih Naw Naw, Lung Wan , Jiv, Petros, Lawmkyin, Geoffrrey Kim le Solomon pawlin hlaphuahmi a tel. Awnmawi cu Mosquito band in an tum ih Lwin Min Htan in a remmawi. Hlasakthiam Solomon KMRH cun kawl in duhdawtnak zaihla Album cu 2010 kum ah a rak suah zo ih tuiṭum thawn kawl in Album pahnih a suahnak a si. Hmaisa sawn cu duhdawtnak hla a si ih tuiṭum cu Pathian thangthatnak zaihla a si. Lai in Album 4 lai a suah hnuah hmailam khalah lai hla khal suah vivo a tum thu theih a si.